اعرف اني زودتهاااااا بس حتعجبكم متاكده

تكملة القصه...
......................
......................

الجزء الخامس:
سالم: انتي بنت معقده ...اخذي تلفونج وطسي غرفتج وان شفت رقعة وجهج مسحته بالارض .....الحمدلله والشكر
مها خذت التلفون منه وايدينها ترتجف ورجولها مو قادره تشيلها ....قعدت على الارض ومسكت التلفون وشافته كل شي مثل ماكان
هي خافت ان خالها يقرى مسجات فيصل اللي كانت مخزنه اسمه بحرف "f" .....بس خالها ماكان ماخذ باله من الاسماء غير اسم واحد هو ساره ...... راحت مها غرفتها وهي للحين خايفه وقلبها يدق بسرعه ...ماكانت متأكده من ان خالها اخذ رقم فيصل او لا ....
سالم من صوب ثاني ماكانت الارض شايلته من الفرحه وعلى طول خزن الرقم بتلفونه بإسم"فرق كبير" وكان يقصد فيه الفرق بينها وبين زوجته ....

::::::::::::::::::::::::::::::
فيصل: عامر انت نمت ؟
عامر: ................
فيصل: عامر؟
عامر: ............
فيصل: فرصه ماتتطوف خلني اتصل على حبيبة قلبي واقولها اني بدربي لها
ويتصل فيصل على مها اللي انصدمت اكثر لما شافت رقمه .....وكلمت
مها بصوت خائف: الووو
فيصل: هلا وغلا براعية هالصوت
مها بارتباك: هلاهلا فيصل
فيصل: عندك احد ؟
مها: لا ماعندي احد
فيصل: اجل وشفيكي خايفه ؟ رصيدك يكفي ندردش مع بعض شويه
مها حست بإرتياح: أي يكفي ....شخبارك فيصل؟
فيصل: وشخبار واحد سمع صوتك .....اكيد انه بخير وشاف العافيه
مها : مو للهدرجه
فيصل: للهدرجه واكثر ...ياحبيبتي انتي ماتدرين انتي بالنسبه لي ايش
مها بدلع : أيـــــــــــــــــــــــش؟
فيصل: ههههههه اعتبر الباب مفتوح لي واعبر على كيفي؟
مها: ..............
فيصل: السكوت علامة الرضا
مها: ليش ماتخليني انا اللي اعبر ؟ كل انت اللي تعبر وانا ساكته
فيصل: يعني فيه مشاعر بقلبك لي؟
مها: وانت توك تدري؟
فيصل: ههههههه ادري من زمان بس ابي اسمعها منك
مها: مدري والله بس احس اني من عرفتك ماودي اخسرك .....صح ان الظرف اللي تعرفنا فيه على بعضنا كان مو مناسب ...بس يمكن كان خير لي ولك ....صدقني يافيصل اناعمري ماكلمت أي واحد غيرك ولا اعرف شلون اعبر عن شعوري تجاهك ...
فيصل: قولي كلمه وحده
مها تستهبل: كلمه وحده
فيصل: هههههههههه ...اقول مها ياحلو الاستهبال,....يالله قولي انا استناكي
مها: أي شقول والله مدري
فيصل: قولي الكلمه اللي عذبتني وعذبت ملايين غيري
مها: مو وقته
فيصل: الا وقته ونص
مها تضيع السالفه: فيصل انت وينك اللحين؟
فيصل: انا جايك بالدرب ياحياتي
مها: هههههه أي صح وانا انطرك
فيصل: ترى انا ما ا ت غ ش م ر معاكي..... تذكرين هالكلمه "اتمغشر" اللحين صرت اضبطها
مها تضحك
فيصل: يازيـــــــــــــــــــــــــن الضحكه ويازين راعيتها عساها دوم انشالله
مها: فيصل ابي انام نعسانه ووراي دوام
فيصل: نغزه قويه يعني تبيني اسكر
مها : أي
فيصل: مابي
مها: انا بسكر وانت كيفك ....
فيصل: مها ماودي اسكر
مها: ولا انا بس .......
فيصل: لا تقولين ماعندك رصيد
مها: قلتلك عندي والله
فيصل: خليني اجي الكويت والله لعوضك عن كل شي
مها: انــــــت ويــــــنك
فيصل: انا بقلبك .....والا انا غلطان
مها: لا والله منت بغلطان ....
فيصل : مها بتنامين
مها: انت كيفك
فيصل: اسف لازعاجك .........ممكن اغنيلك
مها: والله اذا صوتك حلو فلا تبخل علينا
فيصل: بما انك اول واخر مره تحبي ....فأهديلك هالاغنيه
فيصل كان صوته حلو وغنالها اغنية :
حــــــــــايره والشـــــوق بين عيونـــــــج........خــــــــــــــايفه تحبـــــين ويـــــــــــــلومونج
ضـــــــــــالــــه بنص الدرب محــــتـــــاره.......مـــــاتــــــعرفين هذا العـــــــشق واســــراره
والــــــســـــهر ذبــــــــل ســـــواد عيــــــونج
فيصل: وســـــــــلامـــــتك
مها: كمل .....
فيصل: كافي ياحياتي الحين نامي والجايات اكثر من الرايحات
مها: يالله تصبح على خير ...
فيصل: مها تغطي عدل ترى الجو بارد
مها : انـــــــــشالله على امرك تبي شي بعد ؟
فيصل: ماابغى غير سلامتك
مها: مع السلامه
فيصل: مع السلامه
ويسكر فيصل التلفون وهو يكمل اغنيته
عامر وهو يلتفت على صوب فيصل : " ياعيني على الرومانسيه يااخي "
فيصل منصدم : هي انت من متى قاعد
عامر : من " هلا وغلا براعية هالصوت"
فيصل منحرج: وليه ماقلتلي انك قاعد ؟
عامر: اقول وقف وانزل ...شبعت نوم ودي اسوق .......ارتاح انت
ومن صوب ثاني " مهـــــــا" كانت حاسه بشي غريب " ياربي شنو نهاية هالحب لايكون هو يتسلى معاي؟ لالا فيصل مايتسلى مشاعره حقيقيه تجاهي ....واضح انه يحبني ...وانا ليش ماانام احسنلي ؟ "
::::::::::::::::::::::::::::::::::::::::::::::::::
وصل فيصل الكويت بالفجر وارتاحوا بفندق يومين ......
عامر: فيصل صارلنا يومين وانت ماسويت شي ؟
فيصل: اليوم انشالله بروح للعنوان اللي عطتني واخطبها رسمي من وليها اللي هو خالها
عامر: طيب وليه مارحتله اليومين اللي فاتوا
فيصل: حبيت اريح شوي
عامر: وخويتك.....ماكلمتها
عصب فيصل لما سمع كلمة عامر: لو سمحت لاتقول خويتي !
عامر: وانت ليه معصب؟ شتبغاني اقول ...حبيبتك؟
فيصل: لاتقول شي ويالله جهز عمرك خلنا نمشي
::::::::::::::::::::::::::::
سالم يتصل على ساره :
ساره: الو نعم ؟
سالم : مرحبا
ساره: مراحب ...من بغيت
سالم: بغيتج
ساره: شكلك غلطان بالرقم
سالم: ليش هذا مو تلفون ساره
ساره: منو انت ؟
سالم: اسمعي ياساره انا رجال سيدا وماعندي خرابيط و...
ساره: هييييييي انت شتبي؟
سالم: ............
ساره: لوسمحت ترى انت ماتهمني كائنا من كان حتى لو تعرفني مو مهم عندي ولاعاد تتصل على هالرقم رجاء
وتسكر ساره التلفون بوجهه ........
سالم: ماعليه يالغاليه ...اصيدج اصيدج
::::::::::::::::::::::::::::
عامر: انت تقول ان هي عطتك هالعنوان ؟ انت متأكد منه؟
فيصل: أي والله متأكد حتى شوف هذي الورقه اللي عطتني
عامر: طيب جرب طق الباب مره ثانيه .....
في هذه الاثناء مر بجنبهم ولد ....وساله فيصل عن اهل البيت وقالهم ان اللي كانوا ساكنين فيه ماتوا وهذا البيت أجار مو ملك لهم
عامر: طيب اتصل يافيصل عليها واسألها
فيصل: ماكو غير هالحل ....الحين اتصل ...
يتصل فيصل على مها .....وكان بجنبه عامر
مها : الو
فيصل: هلا مها ...كيف الحال
فيصل: بخير
فيصل: اقول مها ...العنوان اللي عطيتيني لما كنا بالمطار
مها: شفيه؟ فيصل انت وينك اللحين ؟
فيصل: مها انا بالكويت ممكن تقوليلي انتي وين ساكنه
مها منصدمه : وشتسوي بالكويت؟
فيصل: ابغى اخطبك....ابيك ابغى اتزوجك انتي
مها: فيصل انت من صجك
فيصل: أي ....واذا انتي منتي موافقه علي قوليلي من الحين علشان ارجع مكان ماجيت
مها: انت بصراحه فاجأتني ...ليش ماقلتلي من زمان عالاقل عطيتني فرصه افكر
فيصل: تفكرين! تفكرين بإيش؟ مها الحين ابغى اسمع رايك ...يا أي يا لا
مها: اذا علي انا ماكو مشكله وين القى احسن منك؟ بس خالي...ظنك يوافق
فيصل: وليه مايوافق ؟ مها ترى كلنا عيال ادم وحوا مابينا فرق
مها: والله مدري اخاف يردك يافيصل والله اخاف
فيصل: اذا انتي تبيني ماعلي من اكبر راس...وخالك ماعليكي منه خليه علي ...والحين ممكن تعطيني العنوان
وتعطيه مها العنوان ويروح فيصل مع عامر لبيت خال مها ......
::::::::::::::::::::::
فيصل: وشخبارك ياابو علي
سالم باستغراب: هلا والله بخير
عامر: الصراحه ياابوعلي احنا قاصدينك انت بالذات وجايين من السعوديه مخصوص عشانك
سالم: خير فيه شي؟ لان انا الصراحه والله مااعرفكم ....واول مره اشوفك
فيصل: انا بدخل بالموضوع بسرعه لاني مااحب المقدمات....
سالم: وانا مثلك تفضل قول.....
فيصل:الصراحه انا جاي اخطب
سالم: نعم؟! ومنو تخطب؟.....اكيد انت غلطان انا ماعندي بنات للزواج
عامر: احنا جايين نخطب بنت اختك لخويي فيصل
سالم باستغراب: شنووو؟ ومنو انتم؟ وشعرفكم فيها؟
فيصل: انا لي ولد خاله بالكويت وكان ساكن عند بيت اختك الاولاني وهو اللي ذكرها لي
سالم: وليش خلصوا حريم السعوديه جاي تخطب هني ؟
فيصل:.............
عامر: ياابو علي احنا ماجينا نخطب الا عقب ماسمعنا عن اهلها الطيبين
سالم: ممكن اعرف منو انت؟
عامر: انا عامر وهذا صديقي فيصل
سالم: وانت يااخ فيصل ماعندك اهل؟ مالك ام وابو؟
فيصل: وليه اجيب العائله كلها معي؟انا اللي بعرس والا اهلي
سالم: اسف؟ ماعندي بنات للزواج
فيصل: طيب اذا انت خايف ان احنا ناس بدون اصل اسأل عنا
سالم: والله انك فاضي اطق درب للسعوديه علشان اسال عنك ...ليش ماوراي اشغال؟
عامر يحاول انه يتدارك الموقف: ياابو علي ...فيصل رجال طيب وهو يدور القرب منكم واطلب المهر اللي تبغيه واحنا حاضرين
سالم وهو يفكر:ها.....لا خلاص انا قلت لا يعني لا
فيصل: طيب انا بعطيك فرصه فكر على راحتك وبجيك عقب كم يوم
سالم:...........
فيصل: فمان الله
ويطلع فيصل وعامر من عند ابو علي ...اللي قعد يفكر في السالفه ....
:::::::::::::
نوره: وانشالله تبي ترفضه
سالم: لاوالله عندج غير هالحل؟
نوره: انا بعرف انت ليش خبل ؟
سالم: نوره شهالكلام؟
نوره: انت تبي البنت تطيح بجبدك ؟
سالم: الرجاجيل واجد وهي توها صغيره
نوره: اولا: البنت مو صغيره ...ثانيا: انا معاك ان الرجاجيل واجد بس تذكر ان بنت اختك المصون محد يعرفها هني على طول بغرفتها...انت ماتبي تفتك منها ...مصاريف ومسئوليه ...ياسالم والبنت تروح الجامعه وتطلع لا ومع رفيجتها ...يعني انت ماتدري وين تروح ووين تجي ....
سالم بعد تفكير: شقصدج يعني؟
نوره: اقول بدل ماتجيبلك فضيحه زوجها وافتك من شرها
سالم: بس مااقدر
نوره باستهزاء: شنو؟ ماتقدر !لايكون ماتقدر على فرقاها؟ انت متى عرفتها ...ياخي البنت هذي من جت بيتنا وانا احس انها هم على قلبي .....ياسالم لاتنسى ان امها لها نصيب في بيت اهلها وباقي الورث والاملاك ..كل شي لها نصيب فيه ...يعني جت من حظك
سالم: والله اني ماني فاهم شي من اللي تقولينه
نوره: ياسالم ياحبيبي انت لازم تصير فهيم ...لما انت تبعد مها خارج الكويت بفعلتك هذي تكسب اشيا كثيره منها انك تبعدها عن الميراث و...
يقاطعها سالم بعصبيه: اهلي بعدهم ماماتوا يانوره والا تبين تورثينهم وهو حيين
نوره: بعد عمر طويل انشالله ..انت شفيك ليش معصب...صدقني بتكسب كثير لما تبعدها
طلع سالم من البيت وهو يفكر بكلامها ....وفي السياره تذكر ساره ...
ساره بعصبيه: نعم
سالم: انعم الله عليج ...ليش معصبه؟ هدي هدي
ساره: لوسمحت انا كم مره قلتلك لاتتصل على هالرقم
سالم: احــــــبج
تنصدم مها من جرأته وتسكر التلفون بوجهه ...وهي تقول فقلبها شيبي هذا؟
..................................
........الجزء السادس:
مها: االظاهر انك ماعرفت خالي للحين؟
فيصل: والله يامها اني ماخذك ماخذك ...ومثل ماقاتلك بالمطار بالحلال
مها: ممكن سؤال؟
فيصل: تفضلي
مها: ......اهلك...يدرون؟
فيصل: مها انا بكون صريح معاكي ...
مها: وانا مابي غير الصراحه
فيصل: اهلي مايعرفون اني جاي الكويت
مها: ليش؟ فاطمه ماتدري؟
فيصل: لا وامي لودرت ممكن تعارض
مها: انا متفهمه لموقفها والصراحه ماالومها...فيصل ارجوك اذا زواجك لي يفرق بينك وبين اهلك ارجوك لاتكمل هالزواج وارجع لاهلك ...
فيصل: مـــســــتحيل اتركك مهما كان .....واهلي خسروني قبل اخسرهم
مها: فيصل انت شقاعد تقول ؟
فيصل: السالفه طويـــــــله اقولك بعدين انشالله لما نتزوج
مها: عندك امل ؟
فيصل: كل الامل ياامل حياتي
مها: فيصل اخاف انت شفقان علي وشايفني مسكينه قلت اكسب اجر فيها؟ ارجوك يافيصل لاتلعب بمشاعري وتعيشني بحلم حلو وبعدين تصدمني
فيصل: ايش هالكلام يامها والله ان كل اللي تقولينه مش على بالي انا والله حبيتك لذاك مش عشان ظروفك
مها: طيب انا عندي محاضره اللحين ...اخليك
فيصل: اقول مها ...خالك مافاتحك بالموضوع ؟
مها بحزن: لا....
فيصل: لاتخافين ياشمعة حياتي انا لك وانتي لي وانشالله اليوم انا عندكم
مها: حيالك الله بس ارجوك تحمل من خالي ترى لسانه متبري منه
فيصل: انا عشانك اتحمل كل شي
مها: والله تعبتك معاي اول وتالي
فيصل : تعبك راحه ....يالله مع السلامه
مها: مع السلامه ...
ساره: اعوذ بالله كل هذا مكالمه مو جنج نسيتيني
مها: ساره تعتقدين خالي بيوافق ؟
ساره: علمي علمج ...خالج هذا مايندرى شيدور تحت راسه
مها: والله اني امس اصلي طول الليل وادعي الله انه يوافق
ساره: انتي من صجج بتتركين ديرتج وتغربين ؟
مها: مافي احد يستحق اقعد عشانه
ساره: واهون عليج تخليني ؟
مها: ساره ترى للحين ترى ماصار شي ...وانا اتوقع ان خالي يرفض وبتم طول العمر مجابلتج لي ما تزهقين مني
ساره تضحك: يــــــــــارب مايوافــــــــــــــــــق
مها: ساره وثول لاتقولين جذي ويالله قومي لاتطوفنا المحاضره
::::::::::::::::::::::
سالم: خلاص انا بشاور البنت واردلكم خبر
فيصل وهو يحاول يخفي فرحته:الصراحه ان مامعانا وقت
سالم: خلاص انت تعال باجر انشالله
عامر: الله يكتب اللي فيه الخير
سالم يستهزىء بعامر: انشالله خير يالمرافق
سكت عامر مع انه كان يقدر يرد عليه ويوقفه عند حده بس شاف نظرات فيصل تترجاه يسكت
عامر: والله انه غاثني بس والله عشانك ساكت
فيصل: يامعود انا ماصدقت يوافق
عامر: مبدئيا بس
فيصل: شتقصد؟
عامر: اخاف يافيصل يحط شروط تعجيزيه
فيصل: كل مايطلب فيه انا حاضر
عامر: بس انت عليك سلفه كبيره وماتقدر تاخذ ثانيه
فيصل: ماعليك ادبرها اتسلف من اللي معاي بالدوام او من رجل اختي
عامر: افا يافيصل والله انك زعلتني وانا وين رحت؟
فيصل: انت اخ عزيز وغالي ....بس انت وشعندك ياحسره ؟
عامر: اللي تامر فيه وصدقني اجيبلك اللي تحتاجه
فيصل : ماتقصر يالغالي
:::::::::::::::
سالم: وهذي كل السالفه..... انتي شرايج؟
مها: والله ياخالي الشور شورك وانا مالي راي بعد رايك
سالم: الصراحه اني مااعرف الرجال بس والله شكله خوش ولد
نوره: اقول مها.....وافقي ترى مو كل يوم البنت يجيلها خطيب....." نوره كانت تبي فرقا مها اليوم قبل باجر مو كرها فيها ...كرها في ساره اللي شافتها خطر كبير عليها وعلى زوجها"
مها بقلبها"انتي مالج شغل": والله ياخالي الامر بيدك ...."ماكانت مها تبي تبين لخالها انها تبيه علشان مايشك بالسالفه"
سالم: وانا برفضه ...الصراحه مايصلحلج
مها وهو مصدومه: لــــــــــــيش؟
سالم: مو توج تقولين كيفك؟
مها: صح بس انا من حقي اني اقرر حياتي وانا حره فيها
سالم بمكر:انتي تعرفينه ؟
مها: وانا شعرفني فيه؟ بس ياخالي انا مابي اثقل عليكم اكثر والرسول صلى الله عليه وسلم قال بمعنى الحديث "من اتاكم من ترضون دينهم فزوجوه"
سالم: ههههههه يعني تبينه؟
مها: ............
سالم: ادري انج تبين فرقى بيتنا اليوم قبل باجر
مها تنزل راسها: ..........
سالم: السكوت علامة الرضا بس انا ماراح اوافق الا بشرط
مها متفاجئه: وشنووو شرطك؟
سالم: قدمي تنازلات...
مها: اكثر من اللي قدمته لك؟
سالم: هذا زواج مو لعبه بعدين ابيج تعرفين شي ماراح ازوجج من أي شخص مهما كان الا لما تنازلين عن كل المعاش لي ........اظنج ماراح تحتاجينه ...مايسوى عليج تجين كل شهر عشان 200دينار؟
مها: الظاهر انك ماتدري شكثر احتاج هالميتين ؟
سالم: والله عاد كيفج هالميتين تنفعني انا اكثر احتاجهم علف للدجاج والغنم اللي بالمزرعه
مها: واذا رفضت اعطيك؟
سالم: ارفض تزوجين طول العمر
مها تروح غرفتها وهي معصبه من كلام خالها..........انتهازي بشكل فضيع
:::::::::::::::::::::::::::::::::::


..........................
وفي اليوم الثاني ترجع مها من الجامعه وتلقى خالها كالعاده عند الباب
ساره: ابعرف خالج هذا مايشتغل ماوراه شي على طول عند الباب حفظت وجهه
مها: والله مدري عنه ياساره
ساره: لا ويغني بعد ....
مها: الظاهر معجب
ساره باستعباط: معجب بمنو؟
مها: فيني!يعني بمنو فيج انتي ...يالله تبين شي ؟
ساره: سلامتج ...وعطيني الموجز ها؟
مها: اوكيه مع السلامه
نزلت مها من عند ساره وكان خالها مقابلها ويطالع ساره
مها: خالي شفيك صارلي ساعه اكلمك
سالم: هلا هلا شبغيتي ..؟
مها: موافقه
سالم: موافقه على شنو؟
مها: اتنازلك عن ال200 ابعرف خالي لو 2000 شتسوي فيني
سالم: أي والله ذكرتيني الرجال بيجي اليوم ....خلاص مبروك مقدما
مها وهي تحس بفرحه اول مره تحس فيها: الله يبارك فييييييك
وراحت بسرعه لغرفتها ..........اتصلت على فيصل...
مها متفاعله: باركلي يافيصل خالي وافق خالي وافق
فيصل مستانس: لا والله مااباركلك الا ابارك لعمري يابعد عمري
مها وهي تبكي : واخيرا يافيصل واخيرا بعيش معاك
فيصل: لاتبكي ياقلبي والله لعوضك عن كل دمعه واخليها بسمه
مها: انا ابجي من فرحتي والله
فيصل: وانا وشقاعدله الحين جايكم
مها: لالالا لا تجي الحين اخاف خالي يشك بالموضوع
فيصل: معك حق ورى صلاة العصر انا جايكم مع المملك
مها: بس انا خايفه يافيصل خايفه
فيصل: خايفه من وشو بعد؟خلاص كل احلامنا بتحقق مع بعض انشالله
مها:خالي طماع واخاف يحط عليك مهر تعجيزي؟..
فيصل: من حقه يطلب اللي يبيه! مدام انتي بنت اخته
مها: مابي اكلف عليك اكثر من اول
فيصل: فداكي... والله تستاهلين... لو تطلبي عيوني انا حاضر
مها: والله مدري شقولك ؟
فيصل: لاتقولي شي خلينا نفرح بصمت
مها: اول مره احس اني ابي شي ويصيرلي
فيصل: صحيح يامها صحيح انتي تبيني ؟
مها: .........
فيصل: لاتسكتين قوليها .....قولي احبك
مها: ........
فيصل: خليني اسمعها منك ....ارجوك
مها: انا بروح الحين ابدل ثيابي ...تامر على شي؟
فيصل: الظاهر منتي ناويه تقولينها .....
مها: كل شي بوقته حلو
فيصل: طيب ,,,,,مع السلامه
مها: لاتزعل
فيصل: ازعل من روحي ولا ازعل منك
مها: مع السلامه
فيصل : مع السلامه
وبعد المكالمه بدلت مها ثيابها وانسدحت على سريرها ...كانت فرحانه من كل قلبها اول مره تحس بالفرح من عقب موتت اهلها .......ابتسمت وكتبت مسج لفيصل ...
مها:"مشكور دخلت السعاده بدنياي ....واخذتني من بحر ياس عميقي ...
فيصل:"لاتنبهر ماجاك مني قليل....انت تستاهل وانا طبعي كريم.....انت مامثلك بهالدنيا بديل....انت آيه صاغها الرب العظيم ....لو يشوفك فاقد العقل الهبيل .....صار مامثله بهالدنيا حكيم .....يكفي انك صرت للشمس البديل...والقمر في غيبتك يصبح يتيم...
::::::::::::::::::::::
ام فيصل تتصل على فاطمه : عزوز ووجع تراك غثيتني قم ناد امك
عبدالعزيز: وانتي كله معصبه .....طيب استني بناديها
فاطمه: هلا يمه
ام فيصل: وينك من زمان صارلي ساعه استنى على الخط
فاطمه: كنت اطبخ الغدا
ام فيصل: ليه مارحتي المدرسه اليوم؟
فاطمه: لا استأذنت من المديره .
ام فيصل: وخادمتك وينهي ماتطبخ الغدا

فاطمه: ارسلتها عند مشاعل بيت جيرانا ماعندها خادمتك
ام فيصل: وليه مسئوله عنها انتي ؟
فاطمه: حرام يمه الحرمه واصله بتولد والخدامه ماوراها شغل تروح تساعدها
ام فيصل: والله مدري متى بتتركين هالطيبه....الا اقول فيصل شبلاه ماصار يتصل كل هذا ابها ؟
فاطمه: خليه يستانس يمه...... بروحه بيداوم الاسبوع الجاي....... خليه يغير جو
ام فيصل:انتي متأكده ان مافيه شي؟
فاطمه:يمه الله يهديكي مافيه الا العافيه انشالله
::::::::::::::::::::::::
سالم: الف مبروك يااخ فيصل البنت موافقه
فيصل: الله يبارك فيك....اروح اجيب المملك
سالم: لاحق يااخي خلها بكره
فيصل: صدقني مامعي وقت
سالم: بس احنا مااتفقنا على المهر...
فيصل: أي صحيح اللي تامر فيه انا حاضر ....
سالم: والله انا ماراح اطلب منك فوق طاقتك .....10 الاف
فيصل: عشرة الاف كويتي يعني ....فوق ال100الف ريال..
سالم: عليييك نور
فيصل بتوسل: لا ياابو علي ارجوك 100الف كثير شاري سياره انا؟
سالم: بتعرس ببلاش انت ؟ والله كيفك عاد...تبيها ادفع العشره
فيصل وهو يحاول معاه انه يخفف عليه ليين وصل المهر 7الاف .......
فيصل: خلاص الصراحه انا مااعرف وين المملك ممكن تشوفه لنا
سالم: اسأل ولد خالتك.....
فيصل: طيب ورى المغرب انشالله بجيبه ...اتمنى انك تكون موجود
سالم: لحظه والفلوس متى تجيبهم ؟
فيصل: اول شي نملك واروح السعوديه اجيب المهر واجي
سالم : انا في انتظارك .........بعد المغرب مو تطول
فيصل وهو طالع ........يناديه سالم: اقووول فيصل انت بتعرس على وحده ماعمرك شفتها بحياتك
فيصل "بقلبه": لواني ماشفتها ...وشجايبني عند الحين " .....مدام انت خالها اكيد بتطلع مزيونه
سالم: صدقت وبتشوفها انشالله بعد الملجه ...
:::::::::::::::::::::::::::
وبعد ماطلعوا فيصل وعامر من عند ابو علي ....
فيصل: عامر شفيك اليوم ماتكلمت ولا كلمه
عامر: مالي خلق عليه ....
فيصل: الا قول مالك خلق علي
عامر: ياابن الحلال لا انت عارف معزتك عندي
فيصل: طيب شفيك متضايق؟
عامر: خايف من ابو علي ذا اخاف انه ينصب عليك
فيصل: ماعليك منه البنت تقولي انه موافق وماعنده أي اعتراض لو دفعتله
عامر: طيب ودنا من هالاسواق اللي يقولون مليانه مزيونات
فيصل: ههههههههه حتى هنا تغازل
عامر: ماني مغازل بس ابمتع عيوني مليت من شوفتك مقابلني 24ساعه
فيصل حس انه مضيق على رفيجه : انت تامر يالسبع كم عامر عندنا
:::::::::::::::::::::::
سالم: شفيها هذي ماترد علي .....اقول حمد ممكن نقالك شوي
حمد واحد من ربع سالم: أي تفضل
سالم : هم ماترد ....وين راحت بس
سالم: مشكور حمد .........
ويحاول انه يتصل عليها اكثر من عشر مرات ...وبالاخير طفرت منه واغلقت جهازها ....
..........................
بعد المغرب ومها قاعده عند خالها :
سالم: اقول مها ترى الرجال بيشوفج ها لاتروحين فوق خلج هني مالي خلق اناديج
مها بخجل مصطنع: شرط يشوفني يعني ..؟
سالم: تعرفين تستحين انتي ...اي شرط يشوفج عجل ها يتزوج وحده مايعرفها
مها: زين بكون هني ...
سالم: تكشخي عاد.... لايشوفج وينحاش
مها: شدعوه...موللهدرجه انا جيكره
علي: يبا في ثلاث رجاجيل يبونك بره
سالم: اكيد الجماعه وصلوا يالله مها سوي مثل ماقلتلج
مها بقلبها: الحمدلله والشكر لو عندك بنت ماقلتلها جذي
.............
سالم: اكتب بالعقد ...ان المهر 7 الاف
فيصل: افا ياابو علي منت واثق اني بعطيك
سالم: واثق بس الاحتياط واجب
وتمت الملكه على خير .............
فيصل بينه وبين سالم: واللحين ممكن اشوفها
سالم: أي بعد صارت زوجتك ....تفضل داخل ....وانت يالمرافق اقعد هني لاتحرك وان لحقتنا ياويلك
فيصل: عامر ماهو بجاهل حتى تقوله هالكلام ياابو علي ترى مهما كان صديقي وماارضى عليه
سالم: لا بعد تعال طقني اتغشمر معاه والا ماتعرفون الغشمره
فيصل: طيب طيب يالله عاد خلنا نشوف البنت
سالم يدخل فيصل الصاله الداخليه وينادي مها ....
سالم يقول لمها : ربع ساعه واجيج ها ....
مها: خالي وين رايح خلك معانا
سالم: هذا الحين زوجج وابخليكم على راحتكم
فيصل كان قاعد بالصاله منزل راسه ويفكر بمها ...بيشوفها عقب فراااق طويل ...ياترى تغيرت ؟
دخلت مها عليه وشافته ماكانت مصدقه : السلام عليكم
فز فيصل من مكانه وماصدق اللي تشوفه عيونه .............انصدم لما شافها ......
...........................................
...........................................






الجزء السابع :
فيصل وهو واقف ورجوله مو قادره تشيله: و....وعليكم السلام والرحمه
مها تغيرت... تغيرت واجد..احلوت اكثر .....استردت عافيتها
تم الاثنين ساكتين وهو يطالعون بعض ....
فيصل وهو يقعد بالكنبه اللي مقابلتها : واخيرا يامها واخيرا انا وياك على ذمة الله ورسوله
مها تطالع تحت وساكته:..........الحمدلله على كل حال
فيصل: انا مسافر بكره.....وبدبر المبلغ وانشالله الاسبوع الجاي او اللي وراه بجيبه ...يعني لاتخافين لو تأخرت
مها: ............
فيصل: ليه ساكته؟
مها: كم طلب خالي ؟
فيصل وهو يتنهد: سبعه....بس ادبرها لاتحاتين
:::::::::::::::::::::::::::::::::::::
من صوب ثاني : اتصل سالم على ساره .....
ساره بعصبيه: نعم ؟انت وبعدين معاك ممكن تنسى هالرقم
سالم ببرود: لحظه شوي شوي خلينا نتفاهم
ساره: نتفاهم على شنو ؟مابيني وبينك شي
سالم: بينا شي كبيييييييييييير
ساره: انا بعرف انت شتبي بالضبط؟
سالم: ابيج .....احبج يابنت الناس
ساره: انت واحد فاضي وماتستحي على وجهك ....واذا تماديت اكثر من جذي انا مضطره اغير رقمي
سالم: اسمي سالم....مايذكرج هالاسم بشي؟
ساره تفكر"لايكون هذا خال مها": سالم خال مها
سالم: هو بشحمه ولحمه
ساره: ..............
سالم: شفيج ساكته ؟اكيييد مصدومه
ساره: انت رجال متزوج وعندك عيال ماتستحي تغازل ؟
سالم: انا حبيتج ياساره وبتزوجج اظن مافيها شي .....ترى الشرع حلل اربع
ساره: اقول امي تناديني يالله مع السلامه
وماعطته فرصه يرد .........
رد ابو علي لمها وفيصل وهو يحس بداخله انه حقق انتصار ....
وفي السياره:
عامر: فيصل والله ماابغى اخرب عليك فرحتك .....بس الله يخليك ودني المستشفى
فيصل: افــــا.....شفيك عسى ماشر...
عامر: والله مدري ياخوك احس بطني بينفجر....الم فظيع
في المستشفى:
الدكتور: ماعليه شر انشالله عطيناه مسكن للالم والظاهر انه مو منظم الاكل
فيصل: دكتور يعني مافيه خطوره عليه..
الدكتور: ابدا ماعليه الا العافيه ..انا كتبتله علاج بس لازم يستمر فيه
فيصل: طيب احنا بنسافر بكره ماعليه شي ها؟
الدكتور: المسأله بسيطه ياأخ فيصل يقدر يروح ويجي عادي
:::::::::::::::::::::::::::::::::::::
الصبح :
مها : ساره ولا عليج امر ممكن تمرين البنك اللحين ..؟
ساره: شتبين بالبنك؟
مها: بعدين بتعرفين كل شي ...اللحين مريه
ساره: تامرين امر ياعروسه ...
مها: تو الناس .....
وتتصل مها على فيصل:
مها: صباح الخير ...
ساره : ياعيني على الذرابه؟؟؟؟؟
فيصل: هلا مها ؟ خرعتيني فيه شي؟
مها: لا...تطمن ماكو شي ...بس بغيت اعرف متى بتروح؟
فيصل: بعد صلاة الظهر انشالله ...ليه؟
مها: ابيك تمرني بالجامعه الساعه 10
فيصل: مها في شي ؟
مها: انت شفيك مستغرب ...والله ماكو شي ...بس بغيت اعطيك شغله
فيصل: خير انشالله...
مها: يالله مع السلامه..
فيصل: لحظه مها.....وين الجامعه هذي بعد؟
مها: كلية الاداب بمنطقة كيفان ....
فيصل: خلاص انا بجي بتكسي والله مااعرف المناطق هنا...
مها: خلاص انطرك 10 مو تنسى!!!!!
فيصل: طيب ...وانا انسى روحي
....................
ساره: بعرف شتبين فيه؟
مها: يعني شبي فيه ....بعطيه فلوس
ساره: فلووووووووووس!!!!!!وليش؟
مها: خالي طالب منه مبلغ جايد
ساره: يامها هذا مهر ومايصير البنت تدفع مهرها......خبري بس الافلام الهنديه
مها: اقول ..الرجال مايقدر يدفع كل هالمهر بعدين انا برجعله شي قليل من اللي سواه عشاني
تروح مها البنك وتسحب الالف ولو انه مايسوي شي بس هذا اللي بيدها ........وطلبت من ساره انها توقف عند مكتبه ...واشترت علبه وكيس وكرت
:::::::::::::::::
الساعه 10 الاربع عند باب الكليه:
ساره: ايوا....ايوا... مها شعليج حبيب القلب بالدرب
مها: طلبتج ساره تكفين روحي لاتقعدين عندي
ساره: طالع هذي شتقول....اخليج مع الرجال بروحكم ...مايجوز
مها: ياغبيه الرجال اللي تكلمين عنه صار زوجي ...
ساره: خلاص بخليج ...
مها: ومن قالج اني بقعد معاج ....
وبهالحظه هذي نزل فيصل من السياره وقرب من صوبها ..
ساره: ايالخايسه ...ليش ماقلتيلي انه حلو ....يهبل ...والله يطير العقل
مها: اذكري الله ....اسم الله على رجلي جان ماصار فيه شي
ساره: هههههه ماشالله والله يهنيج معاه...............وتدخل ساره داخل الكليه "تلاقيني بالمكتبه"
فيصل: السلام عليكم...
مها: هلا وعليكم السلام
فيصل: اكيد مناديتني تبي تشوفيني قبل اروح ...تصدقين حتى انا كان ودي اشوفك قبل امشي
مها: أي صح....وبعد في شي ثاني ...
فيصل: .........
مها: بغيت اعطيك شي...
فيصل: وشو؟؟؟
مها: هذا الكيس فيه ظرف ....ومابيك تفتحه الا لما توصل السعوديه بالسلامه
فيصل مستغرب: وشفيه هالكيس....؟
مها: شوية اوراق...
فيصل: وش اوراقه؟
مها: ياكثر اسألتك ....يالله احلف انك ماتفتحه الا لما توصل
فيصل: مو قبل مااعرف وشفيه...
مها: قلتلك اوراق .....المحاضره بتبدي بعد دقيقتين ...وغلاتي عندك لاتفتحه الا لما توصل هناك
فيصل: طيب طيب والله ماافتحه الا لما اوصل انشالله ..
مها: يالله تروح وترد بالسلامه ...
فيصل: وبس....؟! هذا اللي قدرتي عليه ...
مها: وشتبيني اسوي يعني؟
..........................
يلا تكملة القصه.....
..........................
..........................

فيصل: مها ترى انا بسافر ها؟ يعني وراي طريق ابغى شي منك يسليني طول الطريق
مها:..........
فيصل: ممكن....
مها: انا فاهمه قصدك ...بس مستحيل اعطيك اللي تبيه
فيصل: ايييي ليه عاد؟ خلاص ترى انتي حلال علي الحين...
مها: فيصل يالله انا تأخرت ....." وتمد ايدها له "
فيصل يمسك على ايدها : ماودي اهدك .....
مها :............
فيصل : اشوفك بخير انشالله يوم تكونين عروستي ....وانشالله الاسبوع الجاي انا عندك
مها:على خير انشالله....ايدي فيصل خلها...شوف الناس شلون يطالعون
فيصل ينزل ايده: كيفهم...انا ماسويت شي غلط ...يكفي اناظر في عيونك اللي بنحرم منها اسبوع..الله يعيني
مها تودعه وتدخل للكليه وقلبها حزين على فراقه ..وفيصل يرجع للفندق مع عامر لان بعد ساعتين بيمشون
فيصل طول الطريق يفكر بالكيس اللي عطته مها شنو ممكن يكون فيه .....
ومها مستانسه لانها تقدر تكلم فيصل على كيفها طول الاسبوع لان زوج المستقبل شرالها كرت ب20 دينار
:::::::::::::::::::::::::::
وفي الطريق ارسل لمها:"خلنـــــــــــــــــــــي ...قصة هوى تسكن كيانك...خلني صورة مسافر في سماك...وخذ حياتي شمعة زمانك....وخذ عيووني ماسكن فيها (سواك)....ولمني ثم"ضمني"بأقصى حنانك...ولمني ياجعلني كلي فدااااااااك...
مها:"ياعلني ماذوق حزنك ولا ابكيك...ياللي تسليني طرايف علومك...لك خافقي خله معك في مساريك...يسري معك لاضقت ينقل همومك ....تزهر حياته يوم يسمع غناويك...على صدى صوتك يعيش محرومك ..."
فيصل:" مها قلبي احترق...والفضول ذبحني ..ممكن افتح الكيس...؟"
مها:" كيــــــــفك سو اللي يريحك مدام انك طلعت من الكويت"
::::::::::::::::::::::::::::::
سالم: انتي اسمعيني بالاول ....ساره ...صدقيني انا مااحب سوالف المغازل والخرابيط ...انا واحد سيدا ماعرفت هالسوالف وانا صغير ..اعرفها اللحين يوم كبرت....؟ صدقيني انا حبيتج من اول مره شفتج فيها ...وانا مو مرتاح مع زوجتي وساكت عليها بس عشان العيال والا صدقيني مااعاملها على انها زوجتي...
ساره: خلصت؟
سالم: ارجوج جربيني...
ساره: مع السلامه..
سالم: ساره فكري بالكلام اللي قلتلج ...خلينا نعيش الحب...والله لأخليج اسعد انسانه بالدنيا
ساره: اكون سعيده لو ابتعدت عني ...
سالم: حرام عليج ليش تحرميني منج؟
ساره: لاني مو واثقه منك؟
سالم: والله العظيم احبج ...الا اموووووووووت عليج
ساره:........
سالم: صدقيني اني ماالعب عليج ..
ساره:......
سالم: ساره
ساره: نعم ..؟
سالم: لاتحطيلي رفض لما اتصل عليج مره ثانيه ..
ساره: يصير خير...
الظاهر ان ساره بدت تحب سالم يمكن لان امها تطلقت من ابوها من كانت صغيره وابتعدت عن ابوها واخوانها...يمكن كانت في حاجه لوجود رجل في حياتها...ويمكن حبته لانه كبير في السن مقارنه بعمرها وان اللي بكبره مو فاضيين يلعبون على الناس...ويمكن لأنها حست ان مشاعره حقيقيه ....
::::::::::::::::::::::::::::::::
فيصل انصدم لما عرف اللي بالكيس وحس بإهانه ....وهو يقول بقلبه..."يعني وشقصدها؟ انا رجال واتحمل ...مابقى الا الحريم يدفعون مهرك يافيصل ...
وطول الطريق وهو ساكت وتغيرت حالته ..
عامر: فيصل وشفيك؟.....المفروض انك تستانس وتفرح؟
فيصل بدون نفس: مافيني شي
عامر: الا فيك شي تغبي علي انا ياخوك ؟
فيصل: متضايق شوي..
عامر: اذا على المهر ولايهمك ..
فيصل: مو بس المهر..
عامر: اول الطريق كنت مستانس وشاق البسمه ...واللحين تغيرت حالتك؟
فيصل: قلتلك متضايق شوي..
عامر بنفاذ صبر: ايييي وشمنه؟؟؟؟؟؟
فيصل: اشيا واجد براسي مضايقتني.........ويشغل شريط عراقي:" صحيح مااشوفك بعد"
عامر: انا بعرف انت وشتبغى بالعراقي شغل ياخي محمد عبدو طلال مداح عبدالمجيد ...يمكن انت الوحيد بالسعوديه اللي تحب الاغاني العراقيه ...
مارد عليه فيصل وتم يفكر بمها ...."ليه سوت كذااااااااااااا"
::::::::::::::
سالم: نوره ترى مالي خلقلج
نوره: ممكن اعرف ليش؟ شفيها يعني لو طلبت منك توديني السوق
سالم: وانا ليش جايب السواق بالله ؟ وليش ادفعله معاش؟
نوره: اولا مو انت اللي جايبه...ثانيا انا اللي ادفع معاشه..
سالم: تعايريني يانوره....انتي ماقلتيلي جيب سواق ولو قلتيلي جان ماقصرت معاج
نوره: هذي مو سالفتنا....
سالم: سوق ماني موديج لان بصراحه مالي خلق ..خليها وقت ثاني
نوره بحقد: زين ياسالم زين............وتطلع من الغرفه
سالم: ولييييييييييييييييييييييييي
.................................................. ..............

من صوب ثاني كان تفكير مها كله بردة فعل فيصل ....شنو ممكن تكون
....................
فيصل تذكر الكرت اللي مافتحه ..,قرر يقرى اللي فيه:
" فيصل...اتمنى انك تكون بخير..ارجو ان تقبل هالالف ولو انها شويه وصدقني لو عندي اكثر عطيتك"
فيصل بقلبه: بعـــــــــد بتعطيني...لايامها كفاني ماجاني
ويوصل فيصل السعوديه الساعه اربع الفجر .....للعلم السياره تعطلت فيهم بنص الطريق وتأخروا
كان الكل نايم والبيت هادي .....كان جوعان ونعسان .....بس النوم غلب جفنه ونسى جوعه
::::::::::::::::
الخميس الساعه ثلاث العصر :
::::::::::::
فاطمه: فيصل قوم الحمدلله على السلامه .....
فيصل وهو يسلم عليها : هلا فاطمه الله يسلمك
فاطمه: متى وصلت؟
فيصل: الفجر...
فاطمه: طيب قوم اخذلك دش على مااسويلك لقمه تاكلها
فيصل: أي والله جوعان ومشتاق لطباخك
فاطمه: بس لاتنسى تزور امي ترى قلتلها انك رجعت ...مسكينه كل يوم تسأل عليك
فيصل: طيب...طيب
- فيصل عند امه- وبعد السلام عليها:
ام فيصل: مابغيت...
فيصل: وشسوي يمه هرج وسوالف وقوم ماينمل من قعدتهم ..وبعدين انا ماطولت ..كلها يومين
ام فيصل: 4 ايام ماهن يومين
فيصل: مثل الشي يمه
ام فيصل: وشلون ابها هي بارده هالسنه؟
فيصل: أي.... بارده........ماشفتي وشجبتلك يمه
ام فيصل: ها وريني وش جبت ؟
وعقب ما عطاها فيصل صوغتها ....
ام فيصل: اقعد عندي اليوم تعشى
فيصل: مايحتاج يمه...
ام فيصل: وش اللي مايحتاج؟
فيصل: ماابغى اتعبك ....
ام فيصل: وانا ابتعب ...انت وشعليك؟
فيصل: ........
ام فيصل: وشفيك ؟ منت على بعضك في شي مضايقك؟
فيصل: لا وشيكون مضايقني يعني ..؟
ام فيصل: ولدي واعرفك ...علمني شبلاك؟
فصيل: صدقيني مافيني شي واذا بتقعدين تسألين ترى مااتعشى عندك
ام فيصل: لا خلاص ماحنا سائلينك ........
مها: الو هلا ساره شلونج؟
ساره: بخير هلا والله انتي شلونج؟
مها: مو بخير..
ساره: افاااااااا!!!!!!!!! ليش شصاير؟
مها: فيصل
ساره: شفيه بعد؟
مها: احس انه زعل
ساره: على شنو يزعل ؟ انتي ماغلطتي بالعكس المفروض يستانس
مها: انتي ماتعرفينه ...
ساره: يعني شبتسوين؟
مها: انا اسألج ...شسوي؟
ساره: اتصلي عليه ..
مها: لا مابي خايفه ..اخاف من ردة فعله
ساره تفكر: امممممممم ...دزيله مسج
مها: فكرت بعد .....برايج ادزله ؟؟؟؟؟ والله محتاره
ساره: أي دزيله شفيها يعني
مها: اوكيه...اخليج اللحين
ساره: علميني بآخر التطورات ها.
مها: زين ...مع السلامه
وتسكر مها من ساره وتقعد تفكر شتكتبله .....
مها:"الحمدلله على السلامه....مدري شقولك بس اتمنى انك ماتزعل علي وانك تفهم موقفي"
ونطرت ساعه كامله مارد عليها ....خافت وبدت الشكوك تسرب لقلبها....."لايكون صارله شي؟"
فيصل قرى رسالتها بس مارد عليها كان يتعشى ببيت امه ........ولما خلص :
فيصل: يالله يمه مع السلامه....
ام فيصل: لاوالله ماتروح ....الليله تمرح عندي
فيصل: تمرح عندك العافيه....انا لازم اروح يوم السبت يبدى دوامي
ام فيصل: لا والله حلفت عليك ماتروح ..الليله تنام هنا وبكره انشالله بعد صلاة الجمعه تمشي ....اقعد عندي يوليدي ودي اكحل عيني بشوفتك ....تدري هالاربع ايام مرت علي كنها اربع سنين ...
وبعد الحاح شديد من امه قرر انه ينام عندها هالليله ....قعد يسولف معاها لي الساعه 12 عقب راح لفراشه وامه راحت تنام ......
تقلب على فراشه لكن ماجاه النوم ...كان يفكر بمها .......وقال :انا وراي مااروح واحط جوالي على المنبه يقعدني على صلاة الجمعه وانام وارتاح "
الرسائل الوارده:1
مها:"فيصل ...ليش ماترد علي ...لاتصير قاسي للهدرجه...حرام تعذب بنت مالها الا الله ثم انت "
وشاف وقت الرساله كان: 11ونص ...رق قلبه لها وكسرت خاطره ...قرر يتصل عليها....
مها كانت نايمه بس وعت على صوت التلفون اللي نسته جنبها: الووووووو
فيصل: هلا مها ....انتي نايمه؟
فزت مها من نومها لما سمعت صوته: هلا فيصل انت بخيييييييير؟؟؟؟
فيصل: انا بخير تطمني....انا اسف لإزعاجك
مها: انا ماكنت نايمه بس غفيت شوي ....
فيصل يتنهد: مها ....شايفتني فقير والا عاجز وماني قادر ادفع مهر..هديتك صدمتني بصراحه
مها: كنت متأكده ان الشي هذا بيزعلك...بقولك كلام ...واتمنى انك تسمعني للاخر وماتقاطعني
فيصل: تفضلي انا اسمعك ..
مها وهي تطلع بره غرفتها بالسطح: فيصل ...انت تحملت واجد عشاني انا حاسه بمعاناتك ترى مافيها شي اذا ساعدتك وخالي طماع وصدقني بياخذ نص المهر هذا اذا ماياخذه كله ...الفلوس اللي عطيتك مو قصدي انها تكون مهر لي انا قصدي اني ارد الدين اللي علي ....واللي صرفته علي بالمستشفى...فيصل لاتحرمني منك انا مابي هالسالفه تطول ودي اتزوجك اليوم قبل بكره ...انا عارفه بظروفك وعارفه انك بتواجه مشاكل مع اهلك بسبتي ...وصدقني راح اتحمل كل شي عشانك......
فيصل: خلصتي كلامك ؟
مها: خلصت واتمنى انك تقتنع فيه..
فيصل بعد تفكير: طيب طيب
مها: شنو اللي طيب؟
فيصل: قبلت عذرك ...فهمتك اللحين ..
مها: الحمدلله ...ومره ثانيه لاتعلقني اذا كنت زعلان مني تكلم قول لاتحط بقلبك
فيصل: احبك يامها..
مها: شجاب طاري الحب؟
فيصل: طاري الحب بكل لحظه معاي ...
مها:اسفه يافيصل اذا ضايقتك بشي ..
فيصل: اللحين اقولك احبك تقولي اسفه..
مها: يمكن مااستاهل كل هالحب الكبير
فيصل: الا تستاهلي واكثر من الحب بعد
مها: ياريت اقدر اردلك ولو جزء بسيط من اللي بذلته عشاني ...
فيصل: تقدرين والله تقدرين...
مها وهي تدخل غرفتها: شلون؟
فيصل: اني اكون دوم في قلبك ومااطلع منه واني اعيش معك العمر كله مرتاح وانك تسعديني
مها: بحاول وانشالله اكون عند حسن ظنك ....
فيصل: ياليتك عندي الحين.....عارفه شكنت بسوي فيكي؟
مها: مدري؟
فيصل: تعرفين بس انتي تبيني اتكلم اكثر...تعطيني مجال
مها: فيصل....انت جريء
فيصل: واللي يكلم قمر مثلك مايكون جريء؟ بس انا اشوفك تراوغين ماتبيني اقول ..
مها: مااحب اسبق الاحداث...احب كل شي بوقته..
فيصل: ياكثر ماسمعت هالكلمه منك...خلينا نستانس شوي
مها: نستانس بشنوو؟
فيصل: ياويلي على حالي..
مها: وليش بعد؟
فيصل: اخذتلي وحده ماهي رومانسيه
مها: وانت تعرف الرومانسيه؟
فيصل: انتي اللي ماتعرفينها والا انا اسم الله علي كل شي اعرفه
مها: زين ياابو الرومانسيه ....نبي ننام
فيصل: اهب....طلعتي مو هينه ....تبغى تنام بعد ...تو الناس لاحقه لاحقه...مافيكي صبر
مها: هيييي ...لاتفهم كل شي على كيفك ياابو الافكار انت.. انا قصدي بنام حسبي الله عليك ماخليتني انام
فيصل: وانا وشعلي ...شذنبي اذا حبك لي حرمك النوم
مها: فيصل والله ميته نعاس السوالف معاك ماتنمل
فيصل: ياكثر مايزفونك يافيصل الله يعينك على حرمتك ....شكلها لسانها طويل
مها: انا لساني طويل ها ؟؟؟؟ يالله تصبح على خير
فيصل يضحك: وانتي من اهل الخير لاتزعلين ها؟ وادعيلي الله يعيني بكره
مها بإستغراب: على شنو؟
فيصل: بقول لامي اني تزوجتك
مها: والله خايفه...
فيصل: خايفه من ايش؟
مها: اخاف تحدك تطلقني
فيصل: ماعاش الرجال اللي يحدنه الحريم
مها: هذي امك واخاف تغضب عليك
فيصل: مو من حقها ....
مها: من حقها واكثر
فيصل: الله يعيني وبس ....قبل كنت اقول من سابع المستحيلات اتزوجك واللحين خلاص مافي شي مستحيل
مها: الله يكون بعونك....يا....حبيبي
فيصل متفاجىء: هــــــــا؟ وشقلتي ....عيدي عيدي!
مها: قلت الله يعبينك
فيصل: وشقلتي وراها؟
مها: فيصل اسفه والله طلعت عفويه
فيصل يصرخ: وليه تأسفين ليه؟ ابيك تقولينها مره ثانيه حرام عليكي عذبتي قلبي معاكي...
مها:........
فيصل: والله اذا ماقلتي والله لازعل عليكي
مها: لا خلاص الا زعلك ...على شرط اقولها واسكر التلفون
فيصل: وانا اسمعك
مها: فيصل انت اكثر من حبيبي ...انت حياتي وعمري ودنيتي
وتسكر مها التلفون ......استانس فيصل من كلامها وطرشلها مسج : " واخيرا كلام حلو يطلع منك ...اللهم زد وبارك....عسانا دوم سمن على عسل وعسالله مايفرق بينا... "
مها:" امــــــــين"
::::::::::::::::::::::::::
يقوم فيصل على صلاة الجمعه .............ولما رجع البيت :
فيصل: يمه ...تعالي ابيك بموضوع
ام فيصل: خير انشالله
فيصل: هو خير اكيد ...بس انا بعلمك قبل لايدري أي انسان ثاني حتى فاطمه ماقلتلها
ام فيصل: هذا انا قعدت قول وشعندك....انشالله ناوي تعرس
فيصل مرتبك: يمه ارجوكي طلبتك تفهميني .......
ام فيصل: أي تكلم قول اكلت قلبي...
فيصل: انا ملكتلي على وحده ...



ولله الحمدخللللللللللللللصت
بس اكيييييييييييييييييد عجبتكم صوووووووووووح
بسرعه الله يخليكم ردوكم